Frutat
Në këtë fund gushti është e pamundur të mos mendosh për frutat. Është e vërtetë që këtu, si në çdo vend « kapitalist » mund të gjesh të gjitha llojet e frutave, gjatë gjithë vitit, veç, vetëm kur është stina ato janë më të mira dhe sigurisht më të lira.
Sikur dikush të më pyeste për frutën që më pëlqen më shumë, nuk di çfarë të përgjigjem. Fiqtë në bregun e detit në Himarë, pjeshkat e fëmijërisë apo karpuzi i pazarit të vjetër me shitësit që në vitet më të bollshme e gdhinin pranë thesarit të tyre. Nëse pjeshkët e vërteta nuk i gjen më as në atdhe, fiqtë nuk udhëtojnë dot, në këtë atdheun e ri më ngelet vetëm karpuzi. Ky i fundit shitet i tëri, një gjysëm një çerek apo një thelë. Në fillim më dukej çudi kjo shitje e copëzuar veç jemi dakort që kështu nuk ke ndonjë surprizë kur e pret në shtëpi. Vetëm tjetri si shqiptare e vërtetë do ta theri karpuzin vetë dhe ndaj bleva një të plotë që më doli verdhacuk. Mendova një transformim gjenetik si këta karpuzat japonezë, por bëhej fjalë për një varietet spanjoll. Nuk ishte i keq veç nuk e di ku e kam lexuar që edhe ngjyra ka të bëjë shumë me si i shijojmë ushqimet. Dhe e imagjinoni që nuk e zgjata shumë me këtë të huajin. Po ju si ja bëni me frutat ?